1Ti 6 | KMG | STEP | Kiŋaŋ qaqa juŋgopieŋ jaŋe sasawa bomboŋfâc-jeŋic sâsec-jopahuc rume-jarenšepieŋ, Anuture šâŋe biŋe babawaha â miti susure fuazacte iŋuc enšepieŋ.

1 Timothy 6

Kiŋaŋ qaqa jaŋere dâŋ

1 Kiŋaŋ qaqa juŋgopieŋ jaŋe sasawa bomboŋfâc-jeŋic sâsec-jopahuc rume-jarenšepieŋ, Anuture šâŋe biŋe babawaha â miti susure fuazacte iŋuc enšepieŋ. 2 Erâ bomboŋfâc-jeŋic gâcne opâ ruac jaŋe ine šiŋuc mi muhuc bawahac jopanšepieŋ: “Mitio sâcnâŋec mocjaha eŋgopeneŋ.” Aricne, “bomboŋfâc-nâŋec jaŋe Wofuŋ manasiŋkepie âgo jauŋ ejareekacte ehâmo-nâreeŋgopieŋ”, iŋuc muhuc kiŋaŋ maŋafec jaha qajarepie sâckeocmu. Go dâŋ i jaza mutâc ehuc faŋ qajarezemec.

Moneŋ mafare andac mi ezo

3 Moc e dâŋ i âke sipurâ moc muhuc Wofuŋ-nâŋec Jesu Kristo ere dâŋbiaŋ qikiŋnehuc miti hatare sâcmutâc râpeckeekac ere šiŋuc muzo: 4 E maŋgâc erâ sahac-ticne bafehuc dâŋ giŋkeme giŋ bašihuc muraocmu, izi sasec-ticne eocmu hâcne. Eme irec iiŋguuŋ, hehefaric, mumusoriŋ, qoqoric, 5 erâ wâc mu qaqatarac hati fuaekac. Ŋic iŋucne jaŋe maŋjeŋic sifuckerâ mamana-jeŋic šikeme, moneŋ mafa fua-nârezejec muhuc miti bajuniŋte mueŋgopieŋ. 6 Miti babajuzi jâmbomac sahacte dope bâbâfua-nârene, mocjaha mukâroŋ tâmiric bajunšepeneŋ. 7 šiŋuc manasunšepeneŋ: Fuanaŋte mâreŋko metariŋ warembeŋ, juku hâmonaŋte iŋuc jaha metariŋ jaha ranaŋmu. 8 Eme irec hâcne nânâ wiac â ŋaqi qoruc fonâreme manapene sâckeha junšepeneŋ. 9 Moneŋ mafa sâko qâhâckezo muniŋmu, jaŋe eesâicte wiwiticko feniŋmu, erâ wiac omane fuŋne fuŋnere sasec bâfuarâ mana utuckehuc sipirickeniŋmu. 10 Moneŋ mafare andaczi sâqocne gâcnere jâcne hâcne. Ŋic tucnezi irec harac ehuc miti hata qâsorierâ bušâic sâko bâfuambiŋ.

Juju sanaŋte hešakiezo

11 Anuture ŋic go wiac iŋucne geŋkezemec. Ehuc tiŋke biaŋ erâ mitihec â mamanasiŋhec â maŋjauŋhec â sasanaŋhec â buuruchec ecmurâ irec fotac qatariezemec. 12 Erâ mamanasiŋte juju gie biaŋ bazemec. Baku juju sanaŋte hešakiezemec. Go irec hâcne hefârecgukicne, erâ go gahac iŋuc ecmurâ ŋic tutumaŋko mupaŋketec manambiŋ. 13 Anutu wiac sasawa juju bâfua-jareekac ere maio â Jesu Kristo kia Pilatorao mumupaŋ fârine muwec ere maio musanaŋke-garekopac: 14 Go sâcmutâc dâŋ mugarekicne i bâbâsifuc tâmiric â bâbâbiene tâmiric reŋkehuc juhaŋte Wofuŋ-nâŋec Jesu Kristo fisizejec. 15 Irec dameŋ maickeme juju aŋac â tâpiri buc focneekac Anutu hâcne, eki motâc rome fua taniŋkeocmu. E ŋicwofuŋ jaŋere Wofuŋ Sâko â fekicne jaŋere Fekicne. 16 E bucticne hâhâmo tâmiriczi, tatamac moczi moc mi rarašine irec maŋnao juekac. E ŋic moczi moc mi honekicne erâ mi honezo. Mumumbiaŋ â tâpiri focneweczi focnehuc juocmu sanaŋ. Jâmbomac.

Hobeteŋne fofo sanaŋ bâfuazo

17 Ŋic mâreŋte moneŋ mafa ɋâfoŋne fojarekac jaŋe jazatec sahac-jeŋic mi bafehuc wiac sisirowenere manapie izi hobeteŋne-jeŋic eme ira mi âtesiŋnenšepieŋ. Anutu e mâriri bâfua-nâreme nâ bac ehuc jueŋgopeneŋ erao âtesiŋnenšepieŋ. 18 Erâ mu jaretec buafec â bokifac erâ eehâmo gie bahuc mitire fârine bocjaha bâfuanšepieŋ. 19 Ehuc hobeteŋne-jeŋic moc fofo sanaŋ i bâfuarâ juju fârine rauckenšepieŋ.

Timoteore uŋsawaŋ dâŋ

20 O Timoteo, go merâfâc garekicne i soŋaŋkehuc bajuzemec. Erâ dâŋ jawane â fârimâc, ŋic gâcnezi bajuhuc šâŋene “dâŋ qame hukicne” mueŋgopieŋ, i qikiŋnezemec. 21 Ŋic tucnezi dâŋ ira hâcne qohotahuc mamanasiŋte hata qâsoriembiŋ. Aki anonoczi ŋoŋerao fozejec.